新民黨主席葉劉淑儀咸豐年代喺中學教英文，教師心態點都搣唔甩，尋日佢兩次企圖糾正公務員事務局局長Ｄ姐俞宗怡嘅發音同用字。可惜Ｄ姐唔係好學生，繼續讀錯字之餘仲駁葉太嘴。
立法會尋日討論公務員薪酬調整，Ｄ姐不斷將調（音：掉）查讀成調（音：條）查，葉太忍咗一個鐘後忍唔住話「局長唔好介意我多口咬文嚼字，係調（音：掉）查、唔係調（音：條）查，聽落有啲刺耳，國語都唔同發音啦」，Ｄ姐敷衍佢講多謝，但讀音照錯。
討論到公務員種族概況時，葉太又忍唔住插口話「唔好意思又咬文嚼字」。葉太話政府叫混血兒做「MixeD」就過時兼且難聽，應該叫做「Multiracial」，政治正確啲白人應該叫「Caucasian」，黑人喺美國就叫「African American」，唔係叫「Eurasians」，事關佢哋唔一定係歐亞混血兒。
忍咗兩次，Ｄ姐終於反擊話稱呼係跟番統計處嘅，葉太一句壓落去話「咁統計處都要改啦」，Ｄ姐就再次無聲出，惟有再次謝過葉太意見算數。