政情：阿涂辦事處也僭建？
僭建風暴餘波未了。正當大家以為所有有份僭建嘅議員經已全被踢爆後，白鴿黨立法會議員涂謹申及該黨區議員林浩揚位於大角咀櫻桃街地下嘅辦事處，又被懷疑有僭建物。
我哋日前上咗林、涂二人被指懷疑僭建嘅辦事處睇過，只見門外有一個加建出嚟嘅招牌簷篷，上面掛上印有二人名字嘅橫額。屋宇署派員視察後，證實該處舖面加建咗裝飾同招牌，但認為舖面裝飾及招牌本身冇結構危險，唔屬於即時取締級別，現階段唔會採取進一步行動。
阿涂接受查詢時好驚訝咁話，唔明點解嗰個招牌會被懷疑僭建，「好奇怪，完全唔明！」林浩揚就話，舖位上手係一間車行，但佢哋幾年前租落嚟後，已即時拆下車行原先嘅招牌，但由於佢哋冇乜錢嘅關係，幾年來都只係用橫額當招牌，重申佢哋從來冇加建任何嘢喎。