政情：何鍾泰追打區載佳
屋宇署署長區載佳屋企騎樓加趟窗唔入則，話係經過自己專業判斷，認為屬於豁免工程範圍，呢個講法等同係話一般市民自己判斷都得，唔使搵專業人士評估啦！聞說工程及測量界好多認可人士都唔多高興，尤其係區載佳係屋宇測量師職系出身，之前就畀屋署另一職系結構工程師質疑偏幫自己人。工程界立法會議員何鍾泰尋日就突然火起，大罵區載佳唔公平、享特權，區招架唔嚟，最後要上司發展局局長林鄭月娥出口相助。何鍾泰平時好少當官員好似仇人咁對待，今次可能同佢代表嘅工程師有關，又唔同講法。
尋日立法會發展事務委員會傾僭建問題，林鄭月娥開宗明義話，唔希望受近日一啲名人高官嘅個案影響討論。議員們都好合作不提個案，唯獨何鍾泰話難得區載佳現身，無辦法唔問佢單嘢，不滿署長被傳媒質疑有僭建後，先至提出四個灰色地帶話自己無違例，「呢四個條件得你知，認可人士點知？真係好唔公平！」
何鍾泰愈講愈勞氣，仲拉埋十一年前前署長蔡宇略被揭搵下屬幫手評估自己間屋拆僭建費用單嘢，質疑屋宇署即刻派人去區載佳屋企評估，都係特權。區載佳自辯話點至有豁免，法例寫得好清楚，唔係佢講嘅。何鍾泰咬住唔放，繼續盤問：「有無升高水平？有無封咗水渠？點解有特權叫署方人員去？」區載佳無奈一一回應「無」，仲話只係當一般投訴，有投訴就派員處理。
何鍾泰講到欲罷不能，再質疑區載佳身為建築事務監督有無上權威，佢話得無問題，下屬睇完都唔敢話有問題啦，質問點解唔搵獨立專業人士攞意見。林鄭呢個時候忍唔住介入，話執法部門收到投訴去執法，係責無旁貸，唔能夠有人驚部分有偏頗就外判責任，所以唔覺得有乜問題。咁先至令一場火併落幕。
林鄭冷水潑大舊石
尋日同場加映一段地產及建造界議員石禮謙「示好不遂」實況劇。話說石禮謙話唔認同要修例畀屋宇署可以申請手令入屋調查，講吓講吓，講到官員應該和而不同多聽意見，再講吓講吓突然同林鄭月娥表明心迹，話「我唔認同你唔等於唔支持你……我係乜嘢都支持你嘅……因為好少官員咁有心……」
不過，林鄭顯然唔領情，回應話：「和而不同嘅評論相信係石議員有感而發，不過話乜都支持我呢，我估係講大咗，我有好多衝住發展商嘅政策，石議員都有意見嘅……」嘩，真係成盆冷水潑過去囉！