中環出更：李鋈麟捐錢10問 唔驚被搵笨
香港人樂善好施，愈嚟愈多慈善團體喺街頭募捐，好多人問都唔問就掏腰包，錢銀容乜易就到手，所以法改會建議立法規管慈善團體，受到好多被監管者支持。東華三院總理李鋈麟都力撐有關建議，事關佢曾親身經歷疑似魚目混珠慈善機構募捐，好彩佢自創一套捐錢十問嘅妙招，確保做個醒目嘅捐款者、精明嘅慈善家。
李鋈麟話，有日佢喺街接連遇到兩個打着「兒童基金」旗號嘅機構籌款，佢哋名稱相似，不明就裏嘅人好容易混淆。此時佢自創嘅一連串問題派上用場，佢會問機構背景、籌款目的，又會問有冇攞「Chapter 88」，事關呢個係認可慈善機構申請免稅嘅必備牌照。如果對方口啞啞，佢仲有條簡單問題，就係問佢機構主席係邊位。對方如果仍然一問三不知，佢就唔客氣警告對方，免被有心人士利用。
好多東華董事局成員同李鋈麟持相同看法，好似總理黃業光、張鳳秋及王賢誌等。佢哋尋日齊齊出席「東華之友每月捐款計劃」活動，呼籲大家養成每月定期捐款嘅習慣。
東華主席張佐華、籌委會主席兼東華副主席何超蕸亦喺度，大家為咗做善事，就算三十幾度酷熱天氣都冇甩拖。
張鳳秋仰慕紫荊俠
黃業光話，太多來歷不明嘅慈善團體公開籌款，會影響善信捐錢嘅信心。做過藝人嘅王賢誌知名度高，經常喺街上被游說捐錢，佢最接受嘅係賣旗，但都會婉拒不知底蘊嘅募捐者。
行善手法不分高下，最近神秘性感嘅「紫荊俠」就熱爆全城，張鳳秋話好欣賞呢位女俠獨行派錢嘅行為，盛讚佢好有古代嘅俠義風範，佢都好想知紫荊俠嘅真實身份。
卓妮