政情：林D9未拆「僭建」捱轟
政府幾時取消區議會委任制呢個免費政治午餐，係立法會泛民議員最關心嘅議題，所以尋日就透過口頭質詢，要求政府講清楚究竟幾時取消。不過，政制及內地事務局局長林瑞麟（林D9）仲係話研究緊，但會喺年底區議會選舉前提出建議，惹來泛民議員極為不滿，職工盟李卓人就單刀直入，大聲質問林D9：「你答我，你幾時拆啲僭建！」搞到林D9即時Ｏ晒嘴。
促除區會委任制
可能林D9心諗，自己一早已經拆晒屋企天台啲僭建物啦，點解又問佢幾時拆僭建呢？阿人就解釋話，區議會委任制呢個「政治僭建」已經由一九九八年僭建到依家，一路都冇拆，佢話：「你（林D9）自己屋企僭建，你都唔敢話要研究係咪一次過拆晒佢啦！」質疑點解政府唔一次過剷走呢個「區議會委任制僭建」。不過，林D9仍然發揮其固有專長，不斷重播自己段「錄音」解釋來應酬大家。