政情：金勞詹煲煙似傳聖火
立法會尋日激辯增加煙草稅七小時，無論煙民或非煙民議員都好踴躍發言。自誇憑住意志力戒煙嘅「金勞詹」詹培忠話，佢煙齡有成二十年，高峰期一日吸四包煙，直頭吸到自覺好似變成聖火一樣。食到變「聖火」呢個形容真係聞所未聞，大家即管聽吓金勞詹點演繹。
煙駁煙得人驚
金勞詹話，聖火咪就係四年一次嘅奧運聖火囉！每次奧運會前都會有傳火炬呢個環節，一支傳一支，就好似佢食煙咁煙駁煙，連打火機同火柴都唔需要。大家想像一吓，咁嘅形容搞笑得嚟，其實都幾得人驚。
金勞詹曾經患頸癌，成功戒煙對佢嚟講係一件好事，佢話，雖然內地有說法話「無煙無酒六十三、無煙有酒七十三、有煙無酒八十三、有煙有酒九十三」，但都不能盡信，所以大家應以健康為重喎。佢亦希望政府研究吓加煙稅係咪真係最有效嘅方法，避免好似今次加稅咁搞到社會唔和諧。雖然金勞詹平時聲大大，但今次講得幾有道理。