政情：庸官唔知醜謀加薪
呢個世界，醜唔係罪，但係唔知醜就係死罪一條。公務員今年加薪幅度破晒紀錄，一眾民望跌至谷底嘅問責官員，竟然厚顏無恥，趁公務員加薪之際，伺機要求將人工恢復至二○○九年自願減薪前嘅水平。立法會幾乎跨黨派反對以曾蔭權為首嘅問責高官加人工，批評政府民望插水，高薪厚祿竟然走去非法僭建，房屋物價、地產霸權、官商勾結樣樣都未解決，所以一旦畀庸官加人工，市民勢必個個激到彈起。
企回復至○九年水平
如果大家仲記得，○九年因為受金融海嘯所影響，高級公務員要減人工百分之五點三八，一班問責官員亦自願減薪百分之五點三八，呢個幅度對呢班腰纏萬貫嘅官員，真係雞碎咁多。兩年後嘅今日，曾班子企圖提出將人工回復至○九年水平，可能佢哋真係無睇過近日自己民望已經「跌停板」。而去年副局長同政治助理中期薪酬檢討，因為個個表現差強人意，所以全部都要凍薪。
企圖加薪嘅消息一出，立法會跨黨派幾乎全Say No。民主黨張文光話，問責官員○九年減薪係順應民情，唔等於依家公務員加得多，就可以加埋一份，而且當日呢班高官有份批准公務員加人工，質疑佢哋有角色衝突，疑為自己叫價加薪鋪路。
政府民望瀕臨落台界線，曾蔭權、唐英年、曾俊華民望「全部肥佬」，張文話，「問責官員聲望在民望中創新低，依家要求加人工，只會令民憤火上加油，咁叫做陸雲庭睇相，唔衰攞嚟衰。佢哋依家係喺錯誤時間，做錯誤嘅事。」
有議員亦都話，公務員同問責團隊係兩個制度，兩者全無關係，認為立法會議員剛在財政預算案辯論時，提出削減高官人工，依家高官竟然反過來要求加人工，完全不符民情，所以勢必反對。職工盟李卓人就話：「社會問題有咁多，統統都未解決，特首至高官，由上至下僭建人人有份，一塌糊塗，邊有理由可以畀佢哋加人工！」
泛民唔撐，建制派都唔敢支持。有建制派議員話，公務員加薪係有一套完善機制，但係問責官員卻是另一套，兩者無必然關係，唔係公務員加咗，問責官就有得加，仲要睇整體表現同市民期望，暗示建制派都唔撐，要求政府搞番掂啲民望先至講。群情洶湧，唔知仲有冇人唔要面提出加薪要求呢？