政情：胡郭秀萍撐金管局遏炒樓
樓市熾熱，金管局早幾日又再出招收緊樓宇按揭，以防銀行按揭貸款風險增加。合和實業主席胡應湘太太胡郭秀萍支持金管局出手，驚住樓市上得快落得快嘅話，一般人會承擔唔起，所以不停出措施穩定個樓市係好應該。
依家啲樓咁貴，係因為內地人甚至全世界都可以嚟香港入市，大家都想保住自己嘅資產。佢話，好多大城市都有呢啲情況，就算世界經濟差都好，紐約同倫敦嘅樓市都不跌反升。依家政府收緊按揭，佢覺得如果一般市民好辛苦買第一間屋開始安居嘅時候，喺按揭方面應該酌量有少少彈性。
至於佢自己，胡太表示佢都有買樓收租，不過已經係好耐之前嘅事。合和本身係一間地產發展商，胡太當然唔係一般師奶喇。
楊家聲話有利有弊
收緊按揭對房屋協會完全無影響，房協主席楊家聲就話，喺香港呢個自由市場，好難可以完全杜絕炒賣，而收緊按揭就對整體樓市嚟講都係有利有弊，因為壓抑炒風嘅同時，亦會令想換大啲間屋嘅用家對換樓卻步。