政情：青委會活動陳振彬乜都話唔知
港澳辦主任王光亞訪港三日，今日下午佢將會見近百青年人，活動由青年事務委員會主席主辦，但對於今日活動嘅安排，青委會主席陳振彬竟然話甚麼都不知道。究竟佢係真唔知，定係假唔知，定係有人叫佢「扮唔知」，真係佢自己先知。
反問記者舉行地點
會見青年，相信必定係佢今次訪港嘅活動焦點，但活動並無現場採訪安排，只能睇電視直播，我哋尋日致電陳振彬，只係隨便問問會面嘅內容，例如出席嘅青年喺如何篩選等，點知佢話自己乜都唔知道，更反問記者個活動喺邊度舉行添。可能會見青年的確敏感，場內場外都容易出事，所以陳振彬至選擇乜都唔知，叫我哋問特首辦。
對於自己乜都唔知呢個現象，陳振彬認為問題唔大，話因為「唔同人有唔同做事作風」喎。
特首辦就話，今日嘅活動由青年事務委員會主辦，由特首辦統籌，講得出有一百青年出席，喺柴灣青年廣場舉行。即係話主辦嘅唔使做，統籌嘅做咗啲乜，唔使話畀主辦嘅知？
咁神秘嘅安排究竟能否聽到青年嘅真心話，今日睇吓咪知囉。