政情：媽打勸曾班子放下官威

媽打退咗休之後，一向專注做籌款同埋青少年工作，所以有「李例捐」嘅花名，據知佢曾婉拒咗唔少人嘅邀請，加入政治工作，佢亦鮮有如其他前高官開腔批評政府，但係可能連善良嘅媽打都睇到眼火爆，所以忍唔住趁住電視台訪問佢時狠批政府諸多不是。

媽打話，話做官要得民心，要顧着市民感受，唔好擺官威，自以為是：「我覺得官威係唔需要，別人要尊重你，唔係因為你好威風，而係因為你好好，因為威只可產生害怕，但你唔係想市民有呢個感受。」媽打一矢中的，曾蔭權等一眾高官真係應該睇吓自己副尊容，係點樣高傲得令人民感到痛恨。

面對八十後不滿勿自欺

呢個政府平日除咗識寫文件之外，即係搞官僚，可能真係無咩叻。媽打話，識寫文件嘅官員大有人在，但係官員要多啲接觸市民，先至叫做有用，先至可以推行得人心嘅政策，佢話：「如果官員願意多接觸市民，可能依家就唔會有啲政策，畀人批評唔夠切實。」

近兩年，八十後撕破一個又一個庸官面紗，更成功壯大聲勢力抗各種強權，最為人記得莫過於去年八十後一次又一次攔截高鐵撥款。媽打話，社會怨氣大，但因為年輕人夠膽有理想，唔會怕權貴，所以先至走出嚟篤穿「皇帝的新衣」：「社會入面係有好多怨氣，呢個大家唔好呃自己，但係點解年輕人會特別多怨氣呢？因為年輕人係最有理想，由佢哋發聲，就係希望多啲政府嘅人會聽到。但我覺得呢班年輕人嘅怨氣，唔係由自己利益出發，佢哋真係希望社會好，所以政府要聽。」

佢臨尾仲教精呢個政府，話同青年溝通，兩個t字最緊要，就係talk同time，即係傾偈同時間。媽打做咗咁耐民政，今次講嘅意見真係塞錢入特區政府個袋，不過睇嚟呢個政府都係會繼續閂埋耳仔，如果佢肯聽人講，都唔使搞到今時今日咁嘅狀況喇。