中環出更：潮青會龍城尋鄉情
要食泰國菜一定會諗喺九龍城，不過喺佢變成「小泰國」之前，係潮州人嘅聚居地，向來好熱衷學習潮州文化兼且推廣畀大眾嘅潮商青委會成員，尋日卅幾人浩浩蕩蕩到九龍城探索潮汕文化。
帶埋仔女出席
佢哋呢個「潮汕文化龍城遊」行程好豐富，首先去睇下賣潮州小食嘅雜貨店，又去九龍城嘅牛腩、魚蛋「名店」搵老闆講解特色之處，午餐就去潮州酒家歎懷舊潮州菜式。食飽飽再去睇下潮州紮作，跟就去「滴茶」食潮式糖餅，行程好豐富。唔少會員都帶埋仔女嚟，好似前潮青主任張俊勇就同細女行孖咇，灌輸鄉情，潮州商會副會長周振基跟唔足全程，都過嚟食飯，支持呢班香港大嘅青年人尋根。
今年係潮州商會九十周年，推廣潮汕文化嘅活動多籮籮，今次由香港潮州商會會董兼青委副主任胡炎松做牽頭人嘅文化遊，足足籌備咗近三個月時間，難怪行程咁順利，間間舖嘅老闆都親自講解啦。
嚟緊七月初，今次做導賞嘅理工大學潮汕語言文化班導師許百堅，會開班教潮語，就算唔係「家己人」都可以嚟學，百堅老師話課餘佢會帶團出去行下，完成課程之後仲會返潮州文化遊添。