中環出更：食拉麵行善 名人逼爆「豚王」

向來大排長龍嘅「豚王」，周日本來拉閘休息，為做善事，「豚王」老闆鄧振豪一早開舖，煮麵請客。「豚王」座位矜貴，只有十多個，Mingo醒目地將客人分流，頭輪時段由保良局總理杜振源一家包咗。杜生話，對日本地震災難深表同情，拍心口捐十萬元賑災。

郭少明街坊裝添風味

專程嚟食麵嘅，仲有莎莎老闆郭少明一家四口、愛沙尼亞駐港名譽領事林建康夫婦、行政會議成員梁智鴻夫婦及立法會議員林大輝夫婦等，各人分唔同時段入座，包保有位坐。

首次光顧「豚王」嘅郭少明好雀躍，專登着條短褲，以街坊裝示人，原來係囡囡教路，話咁至有街坊風味。金刀梁胃口唔錯，擦完一碗仍嫌未夠喉，想話打包多一碗，點知老闆話，「豚王」不設外賣喎。

拉麵籌款宴由朝早十點半到晏晝四點，Mingo話，預計煮二百碗請客，食晒就拉閘收工。呢趟出錢又出力，都算唔話得。咁撐日本，有原因嘅。Mingo回想日本地震當日，佢身在成田機場，準備返香港，抬頭望見機場大樓劇烈搖晃，連冷氣槽都震到跌落地，幸好有驚無險，平安返港，自己咁lucky，好應該幫吓其他人喎。

郭少明（右一）拉埋一家四口齊歎拉麵。	牙痛康復嘅林大輝（左一），食麵特別滋味，左二為林太。	梁智鴻（右）怕湯汁濺到恤衫，喺領口掛圍巾，梁太（左）則無拘無束。

卓妮