食品被塑化劑污染問題牽連甚廣，繼飲品、蒟蒻、即食麵外，台灣部分河川嘅淡水魚都驗出有高濃度塑化劑DEHP，跟手連大藥廠都一樣中招。正當大家都聞膠色變時，食物及衞生局局長周一嶽就滋油淡定，尋日入沙田馬場為惠澤社群盃做頒獎嘉賓，仲攞塑化劑來開玩笑，話希望參加盃賽嘅「塑料勁」唔好跑出，結果匹馬三甲不入，真係畀佢把烏鴉口講中咗。
周一鑊話，自己平時好少入馬場，但入親場嘅話都會做足功課，好似尋日佢都有刨定馬簿，知道有匹馬叫「塑料勁」，但佢話真係唔想呢匹馬跑出，事關匹馬輸咗，啲投注就可以用來做善事喎。不過，匹馬係六十三倍大冷門，投注額多極有限，睇怕周一鑊近期因為畀塑化劑問題搞到好煩惱，先至搵人哋匹馬嚟講笑兼詛咒啫！人哋馬主改名總有其意思，無喇喇咁樣畀人攞嚟開玩笑，唔知馬主有乜感受呢？