政情：六四絕食有人偷食？
香港專上學生聯會今年六四喺時代廣場對出空地，進行連續六十四小時嘅絕食活動，不過其中一位參與者港大學生會外務副會長蕭健滔，就畀人質疑佢犯規「偷食」，日前仲畀港大學生會評議會對佢通過遺憾動議。不過蕭健滔就強調事件只係一場誤會，自稱只係喺絕食活動結束後冇聽護士勸告，偷食牛腩麵同芝士蛋糕，絕冇喺絕食期間食嘢。
前日學生會評議會傾番六四燭光集會安排問題，期間有人揭發蕭健滔早前喺網站留言，自爆「我已經偷食了很多東西；胃痛」，懷疑佢喺絕食活動中偷食。蕭健滔就話個留言係活動完咗之後先發貼嘅，強調絕食時一直有護士睇住佢哋嘅健康情況，話長時間冇食嘢會影響消化系統，吩咐學生活動完咗後暫時只准食粥。不過佢就冇聽護士話，去咗食牛腩麵同芝士蛋糕，卒之搞到胃痛，仲要畀人誤會添。
蕭健滔已經喺評議會交代事件，再三強調絕食期間除咗清水外，連健康飲品都冇飲過，遲啲會再發聲明澄清指控。學聯常委會主席鄧建華亦對蕭健滔投下信任一票，指偷食事件完全係子虛烏有。