政情：任亮憲講界女勁風騷
有「維園阿哥」之稱嘅人民力量成員任亮憲，喺強姦案風波甩身後，話就話以後會小心謹慎，不過佢尋日出席電台節目，畀女主持質問佢係咪好風流時，佢就話「男仔識女仔、女仔識男仔好正常」，仲反問女主持「你夠接觸好多男仔啦，你點睇吖？」妙語連珠嘅佢認真風騷。
主持人之後又追問佢係咪有好多女朋友，之前嘅男女關係係咪好Casual（隨便）。任亮憲自言女友數目唔可以用「多」字嚟形容，不過就有固定嘅感情生活喇！佢又唔認自己男女關係Casual，只係不嬲「對人好有信心，抱住真心誠意」喎。佢坦言自己一直喺外國讀書，返港後發現大家文化係有「差異」，要相應調整一下，「依家冇咩識新朋友，識朋友都會選擇。」
任亮憲嘅爸爸前立法局議員任善寧，喺風波中一直力撐自己個仔。問及爸爸當年都係民主派一員，但政治立場同表達手法都溫和得多，唔似任亮憲咁激。任亮憲直言爸爸做議員時嘅政治環境同氣候都同依家唔同，依家唔大聲人哋聽唔到，引唔起關注，所以爸爸嗰套已經不合時宜。