政情：范太：王光亞不宜談選特首
國務院港澳辦公室主任王光亞將於今午抵港訪問三天，佢會否趁機就下屆特首人選向港人收風甚至放風，備受各界關注。不過，其中一名疑似特首候選人、全國人大常委范徐麗泰尋日出席一個青年高峰會時被問及有關問題，佢就話王光亞今次訪港係想同各界人士見面，唔適宜喺咁嘅場合談論有關下屆特首或者疑似特首候選人嘅事喎。
范太話：「正正因為佢（王光亞）係中央好高層嘅官員，我認為佢唔適宜講呢方面嘅說話，如果唔係香港會有啲朋友話，你睇吓中央幾明顯干預香港嘅事務。」范太呢番言論一出，各界即時議論紛紛，有政界中人話，睇番《基本法》，特首人選係必須經過中央任命嘅，絕非純香港事務，點解中央高層官員唔適宜談論呢？
呢位政界中人又話，香港有好多政商界人士，包括范太本人，近排都不斷就下屆特首嘅條件及人選公開表態，范太仲提到下屆特首要面對《基本法》第二十三條立法挑戰添，咁又算唔算干預呢？點解自己講就得，但係又唔畀人講呢？真係好令人費解。唔通有人擔心王光亞會講咗啲唔啱自己聽嘅說話？或者擔心啲說話會影響大局？