政情：煲呔妻也用人唯親？
煲呔曾間位於麥當勞道六十四號嘅祖屋，前一排畀我哋揭發違規改建，屋宇署最終要發信要求佢執番正間屋，事後一直死撐嘅煲呔曾亦成功淪為香港之恥。勢估唔到呢單醜聞曝光，竟然牽引出另一單疑似違規事件，今次主角係煲呔曾嘅老婆曾鮑笑薇。有人質疑佢用人唯親，冇跟程序指定一名未達標嘅公務員做自己嘅司機，為期仲已經超過一年。如果指控屬實，隨時又會演變成另一宗大醜聞。
或有違政府程序
話說煲呔曾被揭違規僭建後翌日，曾太乘坐特首辦車輛到現場視察，有知情人士睇完本報報道後，認得其中一張圖片顯示嘅曾太司機，只屬較低級嘅「貴賓車司機」職級，照道理應該唔可以接載曾太呢類級數咁「高」嘅人物。投訴人仲話，據聞曾太呢位司機曾經參加過升級試，不過就過唔到關，但由於曾太用慣咗呢位司機，於是夾硬繼續要佢「越級」揸車。咁樣做不但可能有違政府的有關程序，仲影響埋其他貴賓車司機嘅晉升機會。
我哋搵過政府貴賓車司機協會主席董兆安求證，佢話擔任特首夫人私人司機，理論上需要比「貴賓車司機」高一級嘅「私人貴賓車司機」，因為貴賓車司機職系分工好清楚，唔同職級嘅員工，應該專責招呼唔同級別嘅官員。不過董兆安亦話，依家為曾太揸車嘅同事，其實只係用「貴賓車司機」身份工作，並冇署任到「私人貴賓車司機」職級，所以好難評論曾太咁做到底合唔合理喎。
負責管理政府司機嘅政府物流服務署回覆本報查詢時話，特首辦有唔同級別嘅司機，特首辦會按運作需要，安排合適嘅司機駕駛唔同車輛，強調並無違規。至於特首辦發言人嘅回覆亦大同小異，不過同樣冇答到，究竟為特首夫人揸車嘅公務員，需唔需要達「私人貴賓車司機」職級。
煲呔曾政府一向畀人批評用人唯親，雖然今次唔可以一口咬定曾太咁做係咪違規，只不過「食得鹹魚抵得渴」，煲呔曾做得政府之首，理應識得避嫌唔好做埋啲踩界行為。不過咁，或者佢覺得依家政府已經進入「看守」狀態，所以連呢啲咁基本嘅政治常識都拋埋一邊囉！