中環出更：陳振彬父子兵非洲獵奇
下個月就係學生哥放暑假嘅大日子，好多家長都廿四孝請假陪仔女去旅行，好似青年事務委員會主席陳振彬（Bunny）就訂好晒機票同酒店，帶兩個囝囝去非洲睇野生動物；全國青聯副主席陳仲尼（Rock）就陪囝囝去美國讀暑期班。
不過，唔係人人都有時間行開吓，好似進出口界立法會議員黃定光（象哥）就遇啱要搬寫字樓，放假都冇得周圍去玩。
每年暑假氣溫動輒都三十度，真係熱到滴汗，尋日喺沙田馬場見到Bunny，見佢着住長袖中山裝，雖然係薄質料，但都咪話唔熱，但無所謂啦，事關佢好快就可以「提早過冬」，事關非洲正值冬天，氣溫只有十幾度，過去避暑之餘，仲欣賞埋紅鶴同動物大遷徙，佢話已搜集晒旅遊資料，唔會去啲危險地方，亦唔怕囝囝水土不服。Bunny尋日就威水，事關佢隻愛駒「傳奇快車」爆冷勝出，獲得四十八萬元獎金，夠佢哋一家豪遊非洲。
陳仲尼赴美伴讀
阿Rock就攞咗兩個星期長假，陪兩個囝囝去美國讀暑期班，雖然佢冇得好似太太咁跟足囝囝四個星期，但有兩星期時間相處已經好寶貴，事關小朋友大得快，好快就有自己嘅世界，所以佢好珍惜親子時間。社會福利署署長聶德權都有三個仔，佢都好明白親子嘅重要，所以都會爭取時間同囝囝一齊放假，但外遊就恐怕唔夠時間，所以多數留喺香港喎。
至於同樣冇得放假嘅象哥，就遇啱暑假立法會要搬辦公室，要坐鎮
實啲文件，連一早計劃好約工聯會會長鄭耀棠去開枱都被迫取消。
另一個仔大女大嘅立法會議員詹培忠就輕鬆好多，年年都會去美國拉斯維加斯賭餐勁，但因為怕暑假多人，所以佢話等到九月先出發喎。
卓妮