美國就話出現龍捲風啫，估唔到香港都有一場狂風掃落葉嘅「僭建風暴」。話說申訴專員黎年一石激起千重浪，狠批政府各大部門對於新界村屋僭建問題長期怠忽職守，隨即搞到人人自危，事關原來好多政客同官僚都係村屋嘅忠實粉絲，而且熱衷於各式各樣嘅僭建工程，互揭瘡疤之下大量權貴淪為犯罪分子。
新鮮滾熱辣嘅醜聞主角輪到教育局局長孫明揚，被揭發五年前擔任房屋及規劃地政局局長期間已經違規僭建。呢單醜聞最令人嬲到吹鬚睩眼嘅係，孫公當時身為打擊僭建物嘅最高級官員，跑馬地寓所居然存在僭建物，接到屋宇署發出警告信都闊佬懶理，五年來不聞不問不清拆。喂，屋宇署雖然係孫公下屬，之但係局長大人都唔使趾高氣揚到當人哋透明啩。更何況天子犯法與庶民同罪，局長僭建冇可能唔使拆！
事實擺在眼前，孫明揚知法犯法呢家嘢都唔使爭拗嘞，否則佢老人家唔會公開道歉，然後急急腳搵人清拆僭建物。功夫茶今日想同大家研究一個極之傷腦筋嘅問題，萬一孫明揚有必要引咎辭職，同樣其身不正嘅尊貴議員又該當如何處置呢？前一排亦係捲入僭建風暴嘅環境局副局長潘潔又點呢？
呢嗱嗱嗱，犯罪名單好長o架，湯家驊啦，陳鑑林啦，黃成智啦，張國柱啦，梁耀忠啦，張學明啦，黃容根啦……功夫茶唔再數落去嘞，怕數到出現數綿羊效應瞓着覺。
好嘞，假設孫明揚有必要鞠躬落台，有識之士就會問嘞，既然天子犯法與庶民同罪，議員犯法是否與官同罪？冇理由局長要辭職，議員就毋須執包袱喎，好唔公平啫！
功夫茶忽然之間諗起新界鄉紳一句擲地有聲嘅鏗鏘金句：「你要拆就全港僭建物一齊拆，唔好淨係搞新界人！」基於同一邏輯，你要滾就全部一齊滾，唔好淨係要一個醜聞局長滾落台！
你話嘞，問題係咪傷腦筋吖？功夫茶深信違規僭建嘅官僚同政客必定長揭長有，若然全部都要滾蛋，恐怕政府總部同立法會大樓將會出現大量空櫈，一個唔覺意令人誤以為曾蔭權政府都參加「一千零一張空櫈」聲援失蹤藝術家艾未未。
唉，計功夫茶話齋，孫明揚當初冇因病辭職簡直係累己累人。之前咪話孫公腎功能衰退嘅，如果及早退休養病咪乜事都冇囉，一來唔會晚節不保被揭發僭建醜聞，二來唔會惹起權貴違規該否滾蛋嘅迷思。呢一鋪自招其辱，想唔到官場元老臨退休仲要累街坊，嗚呼哀哉！