振英哥一句「當仁不讓」，值此雞鳴風雨，有點兒「英」氣的，豈能甘心只做神州袖手人？政務司司長唐英年憋了好一陣子，終於不想再條條fing，開聲講嘢喇。
不過，唐唐一開口又夾着脷，講真你含住銀匙出生，最有研究係紅酒而非民生，「八十後」的苦悶與出路困境你知幾多？在你咁嘅思維模式下，香港明天不會更好。老朽要話你知，你嘅價值觀好有問題！人的尊嚴，無關富貴貧賤，雖然「窮也要窮得有骨氣」很教人心酸，然而，作為人，有時總要拿點平衡，有所為有所不為。中國之所以有今日，如果人人要白手興家追求夢幻，咁就冇林覺民、譚嗣同、秋瑾呢啲熱血青年。
如何看貧富懸殊？是不是年輕人都要白手興家，雙手擂着大地：「為甚麼我不是誰？」唐唐，如果年輕人個個都向錢看，這個社會不會更好，人心只會更壞。內地大把例子，老朽都唔想多講咯。
唐唐，一個人並不是因為他是某某某就受人尊敬，同樣，一個人不是因為他坐在高位才受人崇拜。你睇，煲呔曾個官方網頁有佢Chok爆扮龍友張相，只惹來網民狂插。阿哥，本港通脹率再創三十二個月新高，衣食住行繼續上漲，基層市民生活叫苦連天，請問該出手時就出手的政府做過乜嘢？
孔子說：邦有道，貧且賤焉，恥也！今香港庫房水浸，貧富懸殊至此，煲呔曾及一眾高官覺得恥辱嗎？唐唐，少點廢話，落區派菠蘿包救經濟吧！