足不出戶，卻能被世界認識嘅女人，緬甸反對派領袖昂山淑姬應該算得上係表表者。不過，昂山淑姬將會有機會透過視像會議同香港人作近距離接觸，事關港大百周年校慶活動「百年．對話」，下星期一（三十日）請來嘅第八位嘉賓正是昂山淑姬。為咗隆重其事，社會科學系院長何立仁親自去緬甸做準備，至於香港就由陳祖為教授打點。
由於機會千載難逢，據講已經有一千名港人報名參加，會獲安排到港大陸佑堂透過視像會議與昂山淑姬對談交流，但陸佑堂只得八百個座位，所以向隅嘅朋友就要喺第二度睇轉播喇。今次交流陳祖為教授負責幫參加者發問，相信大家都好想知道昂山淑姬為理想要同家人分開、對緬甸民主路嘅睇法，當然唔少得問佢喺經濟同政治方面，中國可以扮演咩角色啦！
上次昂山淑姬接受電視節目訪問時，話希望中國年輕人可以改變去緬甸只為商業利益嘅目的，希望雙方可以有公平、平等嘅關係，今次大家可能再有機會問佢呢類問題，唔知佢又會點答呢？