政情：陳秋霞現身清華頒獎
回饋社會，其中一個好方法，就係捐助大學作育英才。最近息影女星陳秋霞都以百盛基金會主席身份，贊助北京清華大學《清華大學學報》舉辦第一屆「百盛—清華學報優秀論文獎」，十七位得獎優秀論文作者之中，其中一位係來自香港嘅浸會大學傳理學院院長趙心樹教授。
港學者論文得獎
後生一輩可能未必認識陳秋霞，如果大家聽過《點解手牽手》呢首歌，就可能會有啲印象。據講陳秋霞兩年前做過一日清華大學學生，曾經喺清華園住過一星期，令佢對清華大學念念不忘，佢更直言如果清華大學有乜嘢需要幫忙，佢都義不容辭，所以就贊助呢個優秀論文獎。
據聞，陳秋霞十分希望呢個獎可以一路延續落去，仲話如果到佢八十三歲嘅時候可以睇到第二十五屆頒獎嘅話，就會更加高興喎。
趙心樹嘅得獎論文分析咗清華大學新聞與傳播學院常務副院長李希光教授，同美國威斯康辛大學傳播藝術系潘忠黨教授嘅一場激烈同被廣泛引用嘅辯論，利用呢場爭論闡釋傳播學嘅命名、使命及構成，並回答曾困擾該領域多年嘅關於學科基本範疇同分工框架嘅問題。