政情：Greg蘇難坐正議員踩多腳
前商務及經濟發展局局長劉吳惠蘭因病辭職至今已有一個半月，之前盛傳有望「廖化作先鋒」嘅副局長蘇錦樑（Greg蘇），至今仍未坐正，莫非真係畀中央「彈票」？Greg蘇早個星期已經以署任局長身份，代表香港到美國出席經濟合作及發展組織貿易部長會議，今個星期又會飛去法國出席另一經合組織會議及世界貿易組織非正式部長級會議，再次以替工身份出席，真係失禮人。
有立法會議員認為，Greg蘇遲遲未能夠坐正，絕對係事出有因。公民起動議員何秀蘭話，尋日Greg蘇喺立法會解答「上網學習支援計劃」招標風波時，有人提及被指與風波有關嘅民建聯區議員葛珮帆，Greg蘇都冇主動申報自己亦係民建聯成員，明顯係政治敏感度不足，未有從「卡片」風波之中吸取教訓。
斥欠政治智慧
日前公開表明會聯同各黨派逼政府擱置競爭法嘅新民黨主席葉劉淑儀，都踩多腳批評負責有關法案嘅Greg蘇，至今連一個電話都冇打番個畀佢，不論係當佢冇到或者後知後覺，都顯示Greg蘇缺乏政治智慧喎。
聽完啲議員咁樣鬧法，相信大家明白點解Greg蘇會無運行喇。