中環耳目：湯修齊李鋈發飯堂商大計
位於銅鑼灣禮頓道嘅「飯堂」以新派粵川菜打響名堂，經常有城中名人去幫襯。卓妮日前就見到博愛醫院主席湯修齊（Henry）喺「飯堂」出現，原來佢同博愛總理李鋈發相約食午飯，密斟下個月帶團去廣州同當地學校交流嘅細節，順便睇吓李氏兄弟嘅私人飯堂有乜好嘢食。
私人食肆變名流蒲點
李鋈發嘅哥哥、東華三院總理李鋈麟係「飯堂」股東之一，發哥話，初時「飯堂」真係諗住做私人飯堂，冇諗過咁受城中政商名流歡迎。佢哋特色係糅合粵菜及川菜精髓，以滿足嗜辣一族嘅口腹之欲。當日發哥推介麻辣嘅「水煮豬雜」、「兩味芥蘭煲」及自創嘅「番茄薯仔豬骨湯翅」，既精緻又具特色。
Henry最欣賞係「水煮豬雜」，因為豬雜好少食，所以間中食吓特別開心。當日在場嘅仲有油尖旺青年社副會長梁偉傑，佢對博愛嘅活動好支持，笑言係半個博愛人。發哥最近接下Henry火棒，做博愛旗下教育委員會主席，為佢哋十三間學校嘅未來發展揸旗，可謂任重道遠。