中環出更：菁英會生力軍接捧上位
匯聚城中叻仔叻女嘅「菁英會」，前晚舉行新一屆執委選舉。常務副主席洪為民（Witman）升呢做主席，現任主席白富鴻就轉任榮譽主席。唔少菁英生力軍接棒上位，除咗全國政協常委楊孫西公子楊華勇升做常務副主席外，康泰旅行社太子爺黃進達（Jason）、馬會大董李國棟公子李民煇（Benjamin）及立法會議員林健鋒公子林凱章（Victor）齊齊榮升執委。
洪為民升主席 被讚投入
逾八十位菁英會兄弟，前晚齊集上環一間酒樓，召開周年會員大會。副主席霍啟剛同細佬霍啟山來去匆匆，原來前晚係啟山牛一，兩兄弟投完票後，匆匆趕返屋企同家人吹蠟燭慶祝。Witman將於七月一日正式就任主席，佢滿腹大計，明年將帶隊首次訪台，又籌辦論壇，所以要cut咁啲公職，創會主席施榮忻都讚佢夠投入，擔起大旗絕無問題喎！
菁英會班兄弟喺社會上獨當一面，嚟緊各自有鴻圖大計。日本旅行風再吹，Jason都話蠢蠢欲動，六月恢復日本團，估唔到反應熱烈，呢頭推出二千幾元沖繩團，轉個頭就爆滿。Victor依家幫爸爸手打理家族玩具生意，穿梭中港兩地；Benjamin就擔任一間國際資產管理公司助理副總裁，認真叻仔。
富豪邱德根孫女邱詠麒（Josephine）都預告八、九月喺成都開五星級酒店，所以近排喺成都多過喺香港。成都麻辣火鍋聞名中外，但Josephine怕辣，即使近水樓台都少食為妙。
北望神州發展嘅仲有身兼菁英會副主席嘅莊士集團太子爺莊家彬（Albert），其家族喺廣州正在興建大型樓盤，亦會喺瀋陽發展商業地產項目。Albert以專家口脗分析話，由於中央壓抑住宅炒風，所以轉而投資商廈、商場嘅升值潛力就更加可觀，近日正喺成都、上海及長沙等地物色靚地喎。