手術成功，病人死亡，呢兩句咁怪雞嘅講法本來只可以係電影對白，估唔到竟然會喺現實世界出現。所以話啫，香港真係千奇百怪乜都有。諗諗下，財爺曾俊華其實都係差不多，派錢成功，民望瓜柴。
手術成功之後病人係點樣死亡嘅呢？有一位叫做文愛興嘅六十歲女士，今年四月初喺深圳醫院驗出患有腎石，返到香港再去屯門醫院詳細檢查，不過驗唔出腎石。跟手佢就去博愛醫院覆查啦，今次確實驗出腎石，然後再去屯門醫院接受微創手術清理腎石。經過一輪唔算太複雜嘅程序之後，醫生向家人宣布，手術十分成功。
點不知手術之後劇情急轉直下，文愛興女士又發燒又嘔吐，離開醫院三十小時之後迫於無奈再次入院。去到五月十八日凌晨，家人突然接到醫院來電，話要進行緊急手術。因乜事幹會咁嘅呢？原來第一次手術之後，有一粒細小腎石遺留體內，支尿管堵塞以及未能排出瘀血，引致肺積水，腎臟心臟等等多個器官衰竭。經過第二次手術，病人一直昏迷，最終居然死亡，由首次入院到返魂無術只係兩個星期。
嗱嗱嗱，呢家嘢就係一如電影情節嘅殘酷現實，手術成功，病人死亡，屯門醫院為街坊街里傾力示範何謂怪雞醫療。如果你係痛失至親嘅家人，你大概都會心生疑惑，到底係咪庸醫又搞出人命呀？究竟係咪公立醫院再整一單醫療失誤呀？最令家人不滿嘅係，要求醫生解釋啦，含糊不清都算嘞，竟然有人態度惡劣咁話：「以後唔會再見你哋呢啲家屬！」
功夫茶唔係死因庭，當然冇資格判斷病人是否死於庸醫屠刀之下，不過根據數據顯示，屯門醫院的而且確死得人多。醫院管理局內部進行嘅○九至一○年度外科審核報告指出，所有急症醫院之中，屯門醫院病人接受急症外科手術後三十日內死亡嘅比率冠絕同儕，死亡人數九十四名，已經係連續兩年「稱王」。
唉，食衞局局長周一嶽管治之下嘅醫療系統其實冇乜可能唔怪雞。醫生又流失，護士又逃亡，莫講話外科容易搞出人命，產科更加係接生接到手忙腳亂。功夫茶親耳聽過一位新進媽咪咁講：真係好驚佢哋忙中有錯調亂我個小寶寶呀！
即係咁，就算屯門醫院唔係百分百醫療失誤害到病人枉死，香港嘅怪雞醫療始終危機四伏。周一嶽同醫管局再唔諗辦法撥亂反正，遲早自作自受o架咋，皆因問責高官最近排住隊入廠大修，萬一有司局長枉死就該煨咯！