環境局局長邱騰華搞環保，不是擾民便是爛尾，如備受爭議的擴大膠袋稅，建議將徵費範圍擴展至全港零售點，日後商戶毋須上報膠袋用量及徵費。政府因行政費高昂，怕麻煩且得不償失，於是免上繳，如此這般兒戲，推政策自然等同自宮。
邱騰華推環保政策，全沒有深思熟慮，想做就做，叫停就停。撇開「環評報告遭司法覆核」、「放棄佔用郊野公園擴堆填區」、「擱置慳電膽現金券計劃」不說，單係「徵膠袋稅」及「停車熄匙」兩項，老朽在此販文認可區已不止一次力斥其擾民多於一切。
事實是，環保團體亦力陳其荒謬，一味自我感覺良好，譬如只公布實施膠袋稅後超市膠袋用量，話就話減九成，然而，根據堆填區的數字顯示，不受規管的膠袋如不織布袋、垃圾袋、紙袋等的使用量卻激增；外國就老實得多，好似新西蘭會全面評估實施膠袋稅之後塑膠使用量，結果係不跌反升。
敢於認錯才有勇氣改過，一味文過飾非只會持續錯下去。英國《金融時報》專欄作家露西‧凱拉韋在《自欺比面對真相更有效》說：如果你認為自己是廢物，你就會變得更像廢物。因此，用一堆半真半假的話來安慰自己，比做甚麼效果都好。邱騰華深明「自我安慰」的奇妙療法，故空掛「環境局長」這光環，卻對改善環境一籌莫展。
難怪有環保團體成員話佢係史上最廢環保官員，寄望佢在下屆政府唔好再出現。老朽亦冀望佢「當仁不讓」自動消失，唔好厚顏撐下去。