做政治人物嘅，不論係好嘢定衰嘢，最緊要就係多人認識。港大民意研究計劃尋日公布市民最熟悉嘅十大政治人物排名，同過去幾年嘅平均排名比較，立法會內嘅新民黨主席葉劉淑儀同人民力量黃毓民都係新上榜，而且一上榜就分別排名第三同第五。兩人都出名經常批評政府，其中毓民更以爆粗掟嘢聞名，再次證明鬧政府係有市場嘅！
另一新上榜嘅係財爺鬍鬚曾，僅僅排名第十，唔使諗都知係同佢早前炮製嘅「史上最廢」預算案有關啦！至於排名頭兩位嘅，就係鬍鬚曾個「大佬」煲呔曾，以及早前搞關愛基金搞到一鑊泡嘅政務司司長唐英年，估計兩人都係因為做得衰嘢太多而聞名。
早前講過「玩多兩個月」才考慮係咪選特首嘅全國人大常委范徐麗泰，今次排名第九，同過往排名冇乜大變動。反觀另一疑似特首候選人、行政會議召集人梁振英就十大不入，搞咁多嘢都係冇市民記得，真係要好好檢討吓喇！