政情：黃英豪獲退三十萬車稅
擾攘咗幾個月嘅增加汽車首次登記稅搞到怨聲載道，政府喺民意及政黨壓力下終於跪低，拋出讓步方案，包括寬免宣布加車稅前已落訂買新車嘅稅收，並安排退稅，令唔少政商界名人受惠。當中回水最多嘅就係金至尊主席黃英豪，佢年初透過公司訂咗部五百多萬元賓利（Bentley）豪華房車，如今可回水三十萬元車稅，佢話無諗過筆錢點使好。
「五散人」之一嘅會計界立法會議員陳茂波都係準車主，佢都慳番十萬元車稅，一於捐去做善事，幫助貧苦大眾。同樣要捱貴車稅嘅經濟動力林健鋒（Jeffrey），早就訂咗架價值百幾萬元新Benz S-Class房車，因為架車要喺政府宣布加車稅後交收，令佢無端端畀多幾萬元車稅。如今政府跪低回水，Jeffrey當堂心情靚晒，話會將部分稅款做善事，又打算同老友食飯慶祝，幫政府積陰德。