政情：鄧永鏘嘆艾未未太招搖
內地維權藝術家艾未未「被失蹤」至今已近兩個月，北京市警方日前更以艾未未涉巨額逃稅為由，將佢「依法監視」。中式服裝店「上海灘」創辦人鄧永鏘（David）尋日講起好友艾未未時，似乎不想多言，仲好隱晦話對方喺內地咁招搖，好易惹麻煩，真係好難搞喎。
David尋日出席漢雅軒畫廊開幕禮時，即時成為傳媒焦點，事關佢囡囡鄧愛加早前公開自爆曾經同艾未未一齊影過輯相，惹起全城轟動。David對此直認不諱，話囡囡都有同佢交代過，仲話自己本身亦同艾未未係好朋友添。對於好友被扣留，David就話自己一直希望對方快啲重獲自由，但亦坦言，對方喺內地咁招積、咁招搖，「明知故犯」，係好易會惹上麻煩。
問David會否喺網誌上為老友呼冤，David就好老實話佢幫唔到對方做啲乜嘢，一定要艾未未靠自己喎。David素來以敢言見稱，今次講起艾未未時都話幫唔到啲乜，睇嚟單嘢唔係咁易拆得掂。