政情：劉夢熊撐任總撼鐵三角
近日三位疑似特首候選人都各有動作，全國政協委員劉夢熊不諱言，其實三位人選都各有缺點，仲話大家「眼光可以開闊啲」，不妨跳出框框諗吓其他人選喎。咁喺佢心目中邊個先夠資格做下屆特首呢？劉夢熊就直指現任中國金融學會執行副會長嘅任志剛係黑馬，仲讚佢夠氣派。
劉夢熊尋日接受電台節目訪問時坦言，政務司司長唐英年冇魄力，行政會議召集人梁振英有魄力，但人緣方面就有改善空間，至於全國人大常委范徐麗泰，雖然民望高，但都要考慮能力、年紀、身體狀況等。
劉夢熊仲提出，做特首要有三大條件，一係要完整、準確咁執行一國兩制；二係要捍衞國家主權同香港核心價值；三就係要有使命感，要完成廿三條立法，為雙普選掃走「地雷」，解決樓價及年輕人社會流動性等問題。
咁邊個先夠班呢？劉夢熊叫大家眼光不妨開闊啲，睇吓任志剛做金融管理局總裁時，喺立法會面對班議員質詢都仲可以攞支筆篤篤篤幾有氣派，就知佢都係黑馬喎。
講開又講，劉夢熊尋日喺中大活動上話，佢清楚粟米斑塊飯幾錢，盛惠三十五元，暗寸財爺鬍鬚曾食米唔知價，不知民間疾苦。