政情：范太開列新特首三大難題
近日各個疑似特首候選人動作多多，好似全國人大常委范徐麗泰就高調表明要「玩多兩個月」先至考慮係咪競逐下屆特首，更早喺上月接受珠海學院新聞系學生嘅專訪，首次大談下屆特首將面對嘅三個挑戰，當中包括被視為最棘手嘅《基本法》第廿三條立法。不過，最弔詭嘅係，范太言談間暗寸近日疑似干預司法嘅煲呔曾，莫非范太有水晶球預測未來同高官啲衰嘢？
部分疑似特首候選人一直對下屆特首要處理嘅問題閃閃縮縮，但范太上月接受學生專訪時卻清楚列出下屆特首要面對三大挑戰，首先係要訂立二○一六年立法會及二○一七年特首選舉方案，其次係要為廿三條立法，第三係要為政府定位。港府當年力推廿三條，激發五十萬人上街，怕事嘅曾班子早已明言任內唔會處理呢個燙手山芋。范太今次毫無忌諱話：「香港十五年都冇做，澳門已經做了」，認為下屆特首有責任為廿三條立法，可算相當勇猛。
至於如何為政府定位，范太話，政府要為人民服務，絕對唔能夠脫離群眾，更唔可以只做一啲自以為係人民需要嘅事，須以民為本咁話。范太仲話，無論邊一屆政府，都應該幫助弱勢社群，令佢哋覺得有希望；唔同市民有唔同嘅訴求、有合理訴求係應該嘅，政府要為佢哋想辦法，唔能夠完全等市場去解決，亦不能將扶持當作干預，如果做到扶持弱勢社群及中小企業，社會就有穩定基礎。
一語擊中煲呔曾要害
最後范太提到香港最好嘅法治精神，認為大家應互相尊重，千祈唔可以畀人破壞呢種和平又理性處理糾紛嘅方式。煲呔曾上星期喺答問大會上，批評有人以環保之名提出司法覆核去阻撓港珠澳大橋工程，係濫用司法程序，結果佢事後被狠批干預司法獨立。雖然范太係喺一個月前講呢番說話，但就一語擊中煲呔曾要害，呢篇訪問揀正喺答問大會後出街，真係夾都冇咁啱。