中環出更：敦煌佛像 駕臨香江
提起「常沙娜」呢個名字，港人或許有點陌生，但講起灣仔「金紫荊」嗰座金色雕塑，正係常沙娜得意代表作之一。呢位中央工藝美術學院院長花咗三年時間，將敦煌壁畫上嘅佛像打造成五尊栩栩如生木雕彩繪佛像，完工後第一時間帶來香港志蓮淨苑展覽，篤信佛教嘅潮屬社會總會名譽會長高佩璇都慕名去參觀。
木雕代泥塑防潮
高佩璇話，驚嘆常老師與一眾學生創意無限，除咗瑰麗壯觀嘅佛像外，還把敦煌壁畫中展現嘅珠寶首飾及地氈圖案等輯錄成書，並帶進現代生活中，出品具敦煌色彩嘅床上用品及餐具，充分體現「古為今用」嘅道理。
參與佛像製作嘅常沙娜學生崔岩話，演繹盛唐佛像畫功，除咗講究造型、顏色和神韻，由於香港較潮濕，所以因地制宜用木雕彩繪取代泥塑。過程中，以佛像輪廓及衣服皺摺最考工夫。五尊佛像，連同四十多幅壁畫摹本，將展出至十一月底。