中環出更：夏佳理趕開行會跣腳跪低
尋日早上天陰陰落咗陣雨，政府總部嘅雲石地板好濕滑，搞到趕住去開行政會議嘅港交所主席夏佳理（Ron）喺門口唔小心跣親，成個人「嘭」一聲跪咗落地。
阿Ron年紀都唔細，咁樣跌一跌，卓妮都戥佢擔心。前日恒生指數跌咗四百幾點，尋日阿Ron又不慎跌親，莫非暗示股市有排跌？
阿Ron開會前十分鐘已抵達政府總部，踏入門口地氈仲好哋哋，但一行到樓梯前冇地氈嘅雲石地板時，就忽然跣一跣失重心成個跪低咗，幾個保安員見狀即刻上前扶起佢。阿Ron起番身後裝作冇事咁行上去開會。不過，卓妮見佢拐吓拐吓咁行入會議室，都戥佢擔心，事關阿Ron都成七十二歲，跌一跌真係可大可小。
留陰影捉實樓梯扶手
卓妮等到阿Ron開完會落嚟，唔知係咪仲留有心理陰影，平時健步如飛嘅佢都要捉實樓梯扶手，一步一步好小心咁行落嚟。
卓妮問佢跌親仲痛唔痛，係咪諗緊嘢分神搞到跌親呀？阿Ron就做咗個手勢表示有少少痛，話只係行得快、地下濕滑先跌親，已經冇事，唔使睇醫生檢查，叫卓妮唔使擔心。
雖然阿Ron睇落好似冇乜大礙，但佢跌親之後，啲保安員都大為緊張，唔知係咪驚再有高官同行會成員跣親，即刻攞地拖拖乾塊雲石地板，仲拖足幾次添！每個官員行入門口，班保安就會提醒佢哋小心地滑，防止再有人跣親。
其實阿Ron喺政府總部跣親都唔係第一次㗎喇，今年一月都試過跣一跣，好彩佢馬步夠穩冇跌低，但係今次就真係跌到應一應喇。
卓妮