嘩嘩嘩！有人撳住搶呀！世風日下咯，難怪國家領導人都慨嘆「道德滑坡嚴重」啦！
光天化日之下邊鬼個明目張膽搶得就搶？之唔係全港十六萬公務員囉，加薪幅度超出估計嚇死人，同強搶民產冇乜分別㗎咋。假如你係納稅人，你大概會覺得條頸忽然之間涼浸浸，事關畀人斬到一頸血。
不如咁啦，先睇睇本來嘅估計係點。公務員團體預料，高級公務員今年加薪幅度大約百分之四以上，但中低層公務員加幅較低，可能跑輸通脹。紀律部隊評議會職方代表倪錫水期望，淨增薪點可達到百分之四點五，佢話呢一個加幅係同其他紀律部隊工會協商嘅結果，形容為「一個謙卑的要求」。
好嘞，跟手睇睇如何明目張膽撳住搶。薪酬趨勢調查委員會公布，在未扣除增薪點，低層加薪百分之六點一四，中層加薪百分之六點九八，高層加薪百分之七點九。本來只係謙卑期望百分之四點五，到頭來失驚無神竟然多出一大截，你話嘞你話嘞，係咪加薪幅度超出估計嚇死人呢？
見到咁喜出望外嘅加薪幅度，公務員團體梗係話「士氣大振」啦，可惜全港小市民就會覺得「士氣低殘」。功夫茶真係唔明，呢一個爛鬼薪酬趨勢調查委員會係點樣計數嘅呢？憑乜嘢話公務員理應得到咁優厚嘅加薪待遇？若然係參考私人機構數據，肯定會有人怒髮衝冠同你講，咪玩啦，私人機構冇可能大幅加薪接近百分之八，拍得住通脹都偷笑咯！
家陣嘅通脹率係幾多呢？本來估計係百分之四點五，啱啱上調至百分之五點四。換句說話嚟講，公務員加薪幅度跑贏通脹有凸，擺明車馬慷納稅人之慨自己友益自己友。
喂，官官相衞利益輸送都唔好咁猖狂吖，小市民就捱生捱死，公務員就榮華富貴，係咪想煽動仇官情意結進一步惡化呀？最離譜嘅係高層加薪百分之七點九，以百萬計年薪仲要人心不足蛇吞象，時薪只有二十八蚊嘅最低工資一族想唔仇視你都唔得啦！
即係咁，不患寡而患不均，香港其中一項深層次矛盾係貧富懸殊，特區政府唔去諗辦法解決問題，反而帶頭製造貧富懸殊，人哋貧者愈貧，自己富者愈富，好難平息接近臨界點嘅民憤啫。
嗱嗱嗱，唔好話功夫茶唔提醒曾蔭權班子，仇官情意結手尾好長㗎，中東爆發茉莉花革命都離不開仇官兩個字。雖然話夕陽政府等收工啫，不過冇人擔保二○一二年換屆之前會唔會出現另一種意義嘅「世界末日」！