香港環境愈來愈劣，空氣質素差到令外地投資者走夾唔抖。鬼咩，出了個環境局局長邱騰華，老朽一早叫佢做「邱騰雞」，當真冇冤枉佢，無論係「停車熄匙」、「慳電膽」、「堆填區」，以及最近嘅「港珠澳大橋環評」，無一不是成事不足敗事有餘；加上十問九不知嘅副局長潘潔，不但幫唔到手，更成日要邱騰華為佢補完一鑊又一鑊，你話邱局長本身材料有限，自己孭住炸彈，又要心驚膽顫去為副局長拆彈，如此虛耗，唔騰雞就假咯！
邱騰華搞環保，一味自欺欺人。實施膠袋稅近兩年，環保署數字顯示，實施膠袋稅首四季共徵收約二千五百五十萬元，遠低於局方預期約二億元。邱局長話：「收得愈少就係愈成功！」當局在堆填區調查又發現：來自超市、便利店等登記商戶的棄置膠袋數量，由六億個減至一億多，表面成效唔錯，可是，對比現時約六萬間零售商舖每年產生約四十億個棄置膠袋，則僅佔約百分之三至四。
如今，邱局長搞完一連串「唔湯唔水」嘅所謂「環保」政策，綠色得個吉，藍天夢中見；邱局長又執意把徵費計劃擴展至全港六萬間零售店，為減輕行政成本，商戶可直接落袋，不必上繳庫房。
新建議涵蓋範圍廣到連買報紙附膠袋都要支付五角，擴大膠袋稅又再一次擾民。政府諮詢文件又無討論罰則問題，邱局長話會巡查、突擊、放蛇，為五角膠袋稅大陣仗過掃黃甚至擒殺恐怖大亨。用到「突擊」，嚇死奉公守法嘅老朽，屆時五十蚊我都就範。