政情：葉劉撐商界撤競爭法
工商界一直想拖垮被喻為「商界廿三條」嘅競爭法，除咗日夜鬧爆外，更喺草案委員會上採取「拉布」手段，務求拖得就拖。佢哋反競爭法嘅行動嚟緊將會升級，事關新民黨主席葉劉淑儀尋日宣布正計劃要求港府撤回競爭法草案，仲話有信心自由黨同經濟動力會支持。不過，呢兩黨都對葉太呢個「激進」做法不置可否，更質疑佢咁做似係政治舉動多啲，大家似乎唔多對嘴喎。
葉太尋日話，擔心競爭法對中小企嘅影響會比最低工資更大，故正密謀喺草案委員會上提出動議，要求港府撤回草案，未來更會積極向各黨同商會拉票。佢仲話反正條例嘅審議工作都處於膠着狀態，撤回草案對大家都好，但就否認係趁商務及經濟發展局局長一職未有人坐正時，殺佢哋一個措手不及喎。
葉太話有信心得到工商黨派支持，但自由黨主席劉健儀就話，佢哋雖然唔會反對，但直言呢個舉措意義不大，「意識形態多於實際」。經濟動力林健鋒就話，要視乎港府未來會就條例作出咩讓步，先至決定會否支持葉太。