煲呔曾尋日出席立法會答問會時一開始就向公民黨開火，不點名指該黨喺大型基建項目快將展開之際，借環保同保育之名，利用法律程序阻撓工程，目的係達到一己嘅政治目的，亦令到七十幾項工程因而停工，對香港有長遠影響咁話。之後喺質詢環節又重複呢個論點幾次，搞到該黨議員發晒脾氣。
公民黨黨魁梁家傑眼見自己個黨被人咁鬧法，即時質問煲呔曾乜嘢叫做濫用司法程序，又話立法會已經一再警告政府為港珠澳大橋工程所做嘅環評報告隨時違法，只係煲呔曾一直聽唔入耳，結果搞出今日嘅局面，仲質問煲呔曾係唔係想叫人大釋法，破壞香港司法獨立。
雙方你一言我一語，十足街市潑婦罵街，部分建制派議員更加入戰團，搞到煲呔曾講講吓又龜縮，話上述言論唔係個人意見，而係社會大眾關心嘅事，總之成個答問會就畀佢哋嘅罵戰騎劫咗。
講來講去，呢場話唔定又係煲呔曾同公民黨上演嘅大龍鳳啫，相信市民會明白嘅！