政情：總商會請搭電車小輪

總商會總裁方志偉尋日公布初步嘅安排，當日電車公司共有十五輛印有總商會一百五十周年標誌嘅電車畀市民免費乘搭，於服務時間內來往港島西區至筲箕灣。至於天星小輪就提供免費乘搭中環至尖沙咀航線，電車同埋小輪當日仲會分別隨機免費派五百份紀念郵票畀乘客。

方志偉話，總商會正式生日係五月廿九日，選擇六月九日同市民同歡，係因為嗰日係商會生日過後嘅第一次股東周年大會。

如果今次免費搭電車、小輪嘅反應熱烈，佢哋會考慮定為每年嘅慶祝活動。

同場嘅天星小輪總經理梁德興，就預告小輪有加價壓力。佢話去年一月一日加咗價之後，至今都冇再向政府申請加價，但依家面臨油價上升及最低工資影響，估計全年會虧蝕七百萬元，所以並不排除申請加價嘅可能性喎。