政情：馮國經彈出變特首大熱

疑似特首變唔似特首

全國人大常委范徐麗泰早前突然改口風，自爆「玩多兩個月」後先至決定係咪選特首，令外界揣測佢係咪得到阿爺祝福，突然由黑馬人選變成大熱門，令其他兩名疑似候選人政務司司長唐英年（唐唐）同行政會議召集人梁振英（ＣＹ）賠率急跌。不過，馮國經前日宣布將會辭去利豐主席一職嘅舉動，即令范太、唐唐同ＣＹ三名疑似特首候選人即時彈開。

正如前港區人大代表吳康民所言，坊間盛傳嗰三大疑似特首人選，其實都各有缺點，例如范太年紀偏高、患過重病同缺乏真正喺政府工作經驗；唐唐就被質疑過分柔弱、表現縮骨同成日講錯嘢；ＣＹ就被指背景過紅、樹敵過多同得唔到商界支持。阿爺想打破框框，另覓人選，亦絕對唔出奇。

雖然馮國經同樣缺乏政府工作經驗，佢今年六十六歲，年紀亦只係細過范太一年，但佢一手將家族企業利豐愈做愈大，企業管治屢獲好評，就足以證明佢嘅領導能力唔差，加上佢身兼全國政協委員，又做過貿發局、機管局、世界貿易組織非正式商務顧問團成員、大珠三角商務委員會主席等，之前亦多次傳過北京想搵佢做特首。

據聞馮國經當年婉拒做特首，一個好主要嘅原因係佢擁有美國護照，一旦放棄嘅話，不但稅務上十分麻煩，將來想攞番亦唔係咁易。

記得當年董建華曾被指與美國關係過於良好，煲呔曾更加獲英女王授勳，同香港嘅前宗主國英國有着千絲萬縷關係，被指為「港英餘孽」，若然下屆又搵番個同美國關係密切嘅人做特首，你都咪話唔惹人遐思！

其實下屆特首一上任，就要面對煲呔曾剩低嘅大堆蘇州屎，包括貧富懸殊、樓價同通脹問題、落實雙普選、西九發展、港珠澳大橋工程，仲有最棘手嘅廿三條立法，馮國經要應付以上種種危機，都咪話唔棘手。