中環出更：哥頓倡復建居屋 畀基層上車
普羅市民被高樓價、高通脹壓到抖唔到氣，連商界名人都睇唔過眼。合和實業主席胡應湘（哥頓）話，政府應該復建居屋，等基層市民有機會上車。王氏港建主席王忠桐就話，市民嘅資產被通脹侵蝕都冇辦法，因為股市波動、樓價又高，現時惟有揸住現金，等市場回調再做部署。
卓妮前晚喺馬場見到哥頓，初時佢唔係好想講樓市，話自己已經退咗休。不過，講到樓市咁熾熱，佢就不吐不快，力倡政府應該復建居屋，令到基層市民唔使捱得咁辛苦。
王忠桐車輪喻樓市
轉頭又見到王忠桐，佢都係通脹之虎嘅受害者，事關佢間公司係做電子產品，早排日本地震導致零件短缺，焗住要入貴貨；加上內地廠房養住成班工人，內地通脹及人工乜都升，導致佢哋成本勁升，迫不得已產品都要加價。
王忠桐仲話，市民如果想資產增值跑贏通脹，暫時咪輕舉妄動，等樓市、股市回調先算。佢又同市民派定心丸，叫大家睇定啲先，形容樓市周期就好似車輪咁有上有落，唔會一路係咁升上去，唔係樓價容乜易升到去十萬蚊呎呀？
卓妮