人人生而平等，但點解有人可以出入豪華私人會所、三五知己打木球，而其他人就只可以去小童群益會、屋邨球場打籃球？以前你或者會歸咎於錢作怪，功夫茶今日話你知，呢啲同錢無關，一切皆因港府太廢。
香港現時有七十幾個私人體育會所同鄉村俱樂部，大部分只接待會員，有啲會籍費用動輒幾十萬元，簡直就係富人專利，窮人禁地。唔講唔知，呢啲私人會所全部坐落官地，由政府以超低價甚至免費批地，而根據地契，會所須向公眾開放，即係話，唔使腰纏萬貫，任何人都有權申請使用。
嗱，怪就怪在，原本應向公眾開放嘅會所，根本唔受平民百姓玩。正如立法會議員炮轟，呢類私人會所係殖民地時代遺留落嚟嘅階級特權，所佔用地皮唔少處於黃金地段，有啲甚至價值過百億添。納稅人變相資助有錢人玩樂，但係當納稅人想使用有關設施，反而要向會所乞求開放，無錢免問，你話係咪荒天下之大謬！
講到呢度，你或者會問，又會咁離譜嘅，明明係公家土地，社會資源，市民竟被拒諸門外，淪為不得內進嘅閒雜人等，究竟係乜嘢理由吖？理由其實好簡單，咪就係因為港府卸膊囉。當局一嚟對私人會所違規拒絕開放不問不究，二嚟又無向公眾宣傳，你知啦，港府施政特色之一就係政策唔講就等於唔存在，普羅市民又點會知道咁多嘢吖。不過咁，知都冇用，好多私人會所當正地方係自己嘅，根本唔會向公眾開放。
再講，就算會所肯向公眾開放，亦諸多限制，手續繁複，有開放等於冇開放。譬如話，假日只限會員專用、申請要先經康文署批准等等，而最騎呢嘅係，法例訂明會所借出包括洗手間等設施畀市民使用，但就唔包廁紙同梘液等，萬一人有三急，又唔記得帶廁紙，咁就狼狽囉！
立法會議員就講得啱嘞，咁荒謬嘅條例不合時宜，直情有歧視市民之嫌，早就應該檢討喇。冇錯，港府係就係做咗檢討，仲建議增加會所對外開放時間添，可惜又係雷聲大雨點小，開放時間由現時每月三十六小時，增至四十小時，加咗四粒鐘咁大把，你話係咪搞笑吖？議員直斥當局玩弄文字遊戲，形同搵笨，絕對鬧得啱。
唉，公共資源人人有份，只因港府無能高官搵笨，官地淪為富人俱樂部，窮人只能望門興嘆，唔怪得近年仇富情緒愈演愈烈喇。計功夫茶話齋，不合時宜嘅法例固然應該廢除，但不合時宜嘅庸官更加應該早除早着。