吳老自與國家領導人單獨見面後，人氣急升，一句「誰能維穩誰做特首」一錘定音，一言而為天下法。可見能夠接近權力中心，即使「怪論」也可成報章頭條，認真老懷堪慰。
夕陽政府不為政府培訓人才，一蟹不如一蟹，搞到阿爺想搵個能「維穩」嘅下屆特首都要仰天長嘯：天涯何處覓芳草？於今夕陽有暮鴉！於是，稍有親和力嘅范太被一注獨贏押下變成大熱。坦白講，老朽愛扒冷，買葉劉淑儀，貪佢夠殺氣！又能屈能伸，從高官到議員，一樣掂。這種升遷起落，最能磨練一個人的幹才。過去已成歷史，明天可以尋夢。
香江多事，親和力夠未必能維穩也。再說，葉劉體魄好，做五年應無問題。當然，老朽心目中的政務司司長係「好打得」嘅林鄭月娥，至於唐唐，諧音「糖糖」，梗係呷着紅酒摸住杯底做財爺派糖喇！佢做過財爺，駕輕就熟，派糖起碼唔會條條fing。
老朽呢個組合係「女女男」，如果全女班就唔多妥，咪心邪，三個女人一個墟而已，講多過做。吳老之組合為「男女男」，成個「嬲」字，一嬲，意難平氣難消，好難維穩也。老朽笑看天下，一廂情願亦歪論而已。
老朽位卑，不宜談國事，應向蘇東坡學習——當年，佢被謫於黃州，最喜與人談鬼。東坡的表哥文與可曾予東坡詩曰：「北客若來休問事，西湖雖好莫吟詩。」郭功父亦有贈詩：「莫向江邊弄明月，夜深無數採珠人。」你看！詩不能吟，月不能賞，形勢如此，不說鬼還能幹甚麼！