政情：美孚戶惡搞林鄭牛一
尋日係十三號黑色星期五，咁啱係發展局局長林鄭月娥嘅生日。因阻建「屏風樓」而惹上官非嘅美孚新邨居民及支持者約十多人，尋日就攜同寫有「反對地產霸權」、「反對官商勾結」等字句嘅紙製生日蛋糕、一束粉紅色玫瑰花及一張有居民簽名嘅生日賀卡，到政府總部外向林鄭月娥「祝壽」贈興。
眾人點起蠟燭，唱出改編生日歌歌詞惡搞林鄭：「今天你生日百般愁，不用這麼愁與慮；人人只要福樂，個個只要安居；官肯改造，必好報。」要求林鄭做好高官應盡嘅責任，解決屏風樓嘅存在問題，讓市民安居樂業，不再受到滋擾。
一直以「好打得」形象見稱嘅林鄭月娥並無蒲頭接招，只委派發展局職員代表收「禮物」，林鄭嘅辦公室位於政府總部八樓高高在上，唔知聽唔聽到居民喺樓下為佢高唱「生日歌」呢？另外，就地產發展商向高等法院申請嘅臨時禁制令，禁止美孚居民阻礙工程，昨日排期到今年十二月十九日至二十一日正式審訊。