如果大家記得，去年運輸及房屋局局長鄭汝樺喺社交網站facebook（fb）搞咗個網上諮詢論壇，結果畀人鬧爆咁滯。事隔多月，尋晚又輪到特首辦「上亞厘畢道」喺fb播出首集「時事Q&A」，頭炮搵咗連維園阿哥都冧得掂嘅民政事務局副局長許曉暉（Florence）上陣，同網民探討社企發展，點知今次網民嘅提問毫無火氣，睇落事有蹊蹺。
就尋晚網民嘅提問，Florence都好似未卜先知咁，全部問題對答如流，好似有晒標準答案咁滯，佢仲帶齊道具上陣，當有網友問佢有乜社企成功例子嗰陣，佢就一件一件道具騷出嚟，腰果、頸巾、畫冊樣樣齊，而且佢全程無食螺絲，對答清晰，加埋本身嘅親切笑容，真係好似政府宣傳短片中介紹預防登革熱病方法個空姐咁款。
政府搞社企唔係特別好成績，照計市民會有好多疑問，但偏偏呢個新推出嘅答問環節冇人彈，一係「上亞厘畢道」廢到冇人睇，否則就係特首辦裝「防火牆」，所有尖銳問題都與世隔絕。