政情：孫公頂硬上望圓CS夢
教育局局長孫明揚早前證實患上腎衰竭，需要接受俗稱「洗肚」嘅腹膜透析治療，但佢堅稱冇諗過辭職休養，令唔少人大惑不解。政界最近出現一個講法，可以解釋到孫公帶病頂硬上之謎，就係為將來有問責高官提早辭職參選特首買定保險，暫時頂住呢個早已搖搖欲墜嘅夕陽政府，確保唔會出現管治真空。如果呢個講法屬實，孫公真係抵得諗囉！
即使孫明揚健康冇出現問題，外界亦早已預計現年已六十七歲嘅佢，會喺明年七月政府換屆時退休，如果佢要因病提早一年離職，亦係相當合情合理。加上擔任佢副手嘅陳維安，係一眾良莠不齊嘅副局長之中，表現唔算係太差嘅一個，若然真係要提早坐正做局長，外界亦唔會有好大爭議，令人諗唔明點解孫公仲要頂落去。
有熟悉孫公同政府運作嘅人士就指出，政界盛傳有意角逐下屆特首嘅政務司司長（Chief Secretary）唐英年，唔會好似煲呔曾當年咁，喺選舉一個多月前先至辭職參選，好可能會提早三至六個月辭職開展選舉工程，換句話港府就要搵人署任政務司司長一段頗長時間，睇實整個已經開始作鳥獸散嘅政府，統領餘下嘅問責局長同全體公務員。不論係計資歷、經驗、智慧同中央嘅信任程度，孫公都係眾多問責官員之中嘅首選。
林D9難分心署任
如果孫公提早離職，按資歷計算，下一個有資格署任政務司司長嘅就係政制及內地事務局局長林瑞麟（林D9）。林D9嘅能力如何大家自有公論，早前佢曾進行「通波仔」手術，再者佢喺呢三至六個月真空期內，要專心
實屬於政制局範疇嘅特首選舉，確保唔會出亂子，要佢再分心署任政務司司長，真係難以令人放心。
除咗上述因素，另一熟悉孫公嘅政界中人指出，雖然孫公唔算好有政治野心，但按照傳統嘅政務官思維，始終係要做過政務司司長先至算係無憾，即使名義上只係署任，但有得三至六個月任期，其實同真係坐正冇乜分別。所以因此推斷，只要孫公健康仲頂得住，佢都會繼續頂落去，圓埋呢個心願先至真正退休！