中環出更：自由黨青年團畀邱副悶親
近期發起蒲吧論政嘅自由黨青年團，日前又約埋去中環蘭桂坊摸住酒杯底談論政局時事，今次依舊有一班靚仔靚女成員撐場外，仲有喺上次聚會甩底嘅運輸及房屋局副局長邱誠武（邱副）。原本一眾青年成員諗住邱副可以就本港房屋政策提出獨特見解，點知邱副只係不斷重複過去嘅爛觀點，表現乏善足陳，真係見面不如聞名。
爛觀點回應房屋問題
邱副一場來到，青年團成員當然就住香港房屋政策問題發炮啦。咪以為現場個個都係專業人士就冇住屋煩惱，有參加者就同邱副反映，話近年樓價真係升得好快，令到大部分香港人生活質素下跌，所以想知政府有乜長遠政策同解決方法，亦有人要求加強「置安心」計劃。不過，邱副嘅解釋講咗等於無講，又話當局會研究大家意見。
自由黨近年積極吸納新血，作為青年團主席嘅李梓敬當晚就帶埋女友參加聚會，唔通佢想招攬女友入黨？卓妮喺現場所見的確唔少八十後，當中不乏事業型靚女，除咗大家見慣見熟嘅「自由黨鍾嘉欣」歐銘絲及方亮瑜外，現場仲多咗位靚女黨員曾肖婷，佢今年將大學畢業，聲言遲啲考完試就會積極參加黨內活動。
卓妮