政情：沈運龍活化工廈有好橋
內地孕婦持續來港產子同搶購奶粉，搞到本港公私營醫院應接不暇，有人就獻計香港應該掌握商機，將生仔發展為第七優勢產業。中華廠商聯合會日前舉行會董飯聚，從事珠寶生意嘅會董沈運龍（Aaron）建議，港府應該食住呢條水，允許空置工廠大廈改建為產子中心，一於門戶大開歡迎內地孕婦來港生仔，將香港發展成為「亞洲生產中心」。
雖然Aaron嘅建議令在場賓客笑成一團，但佢好認真猛話自己唔係講笑。佢主意多多，又話既然內地人咁鍾意嚟香港搶購奶粉，港人都應該掌握呢個商機，致力將香港發展成為「亞洲奶粉中心」喎。Aaron講得咁盞鬼，兼且又充滿創意，引起口痕友好大回響。
不過，笑完之後冷靜諗吓，如果單純以生意眼光嚟睇，產子中心肯定有得做，但產科醫生係咪足夠、生產大量ＢＢ後嘅教育及社會政策係咪應付得來，好值得大家探討。