政情：夏佳理提倡重視英語
香港學生嘅英文水平經常都為人詬病，究竟大家明唔明學好英文有幾重要呢？行政會議成員夏佳理（Ron）尋日以港交所主席嘅身份，為香港傑出學生協會青年高峰會演講，佢提到如果要維持香港嘅競爭力，其中一項重要元素就係要保持香港嘅英文水平。
阿Ron嘅英文水平毋庸置疑，經歷過殖民時代嘅佢，覺得英國人留畀香港嘅其中一樣嘢就係英文，因為今時今日國際商業社會嘅語言都係英文，所以外國人才來港工作，無論去餐廳點菜、去銀行理財，甚至睇新聞都要用英文。
自從香港回歸，國家實力提升，唔少香港學生都要學習「煲冬瓜」，阿Ron相信呢樣固然重要，但強調保持英文水平一樣重要，咁樣香港學生先至可以通曉兩文三語，成為香港嘅競爭優勢。好彩答問環節時，香港學生都可以用流利英語發問，相信阿Ron可以放心啦！