政情：葉劉淚別香滑奶茶
最低工資今日實施，對僱主有幾大影響仲未知，但灣仔有間茶餐廳就話因頂唔住通脹、加租及最低工資三大壓力，喺尋日光榮結業，仲搞到新民黨主席葉劉淑儀淚灑當場，話唔捨得茶餐廳啲香滑奶茶喎！葉太不嬲都予人女強人感覺，因一杯奶茶而喊，真係難以置信。
葉太喺社交網站facebook上話，呢間茶餐廳開喺佢灣仔辦事處附近，不時都會幫襯吓，又會同老闆娘傾吓閒偈，順便諮詢吓佢哋對政府各項政策嘅意見，稱得上係民意溫度計。不過，茶餐廳生意難做，仲選擇喺最低工資實施前夕結業，相信支持最低工資立法嘅葉太都好感慨。
尋日葉太特登約埋匯賢智庫嘅同學仔去茶餐廳食「最後午餐」，除咗叫餐廳招牌菜之外，仲有帶着強烈寓意、堪稱「預算案革命」嘅粟米斑塊飯，真係唔知攞景定贈興。葉太仲話，即使將來再有餐廳開業，相信唔會再有平民化價錢嘅食物供應，對市民唔知係好事定壞事喎。